Cyfle Cymru
Pwy ydym ni

Mae pëer cynyddol y Rhyngrwyd yn gweddnewid y ffordd y mae pobl a chwmnïau yn masnachu yn aruthrol. Mae Cyfle Cymru yn bodoli i helpu busnesau i dyfu drwy ddefnyddio'r Rhyngrwyd, ac yn enwedig, eFasnach. Mae gan y term 'eFasnach' amrywiaeth o ystyron, ond yn y cyd-destun hwn ystyriwn ei fod yn golygu trafodyn masnachol a wnaethpwyd drwy ddefnyddio'r Rhyngrwyd - megis cysylltu â chwmni i brynu nwyddau ar ôl eu darganfod drwy eu gwefan.

Mae busnesau yng Nghymru yn ymwybodol o bwysigrwydd eFasnach, ond amlygodd ymchwil a wnaethpwyd ym mis Ebrill 2000 gan NOP gyn lleied o bobl a oedd yn ei ddefnyddio. Nododd yr ymchwil, er bod busnesau yn ymwybodol, nid oeddent yn sicr o sut i sicrhau mantais i'w busnes, a sut i ddiffinio beth yw'r manteision yn y lle cyntaf. Caiff ymwybyddiaeth isel ei ategu gan gysylltedd isel â'r Rhyngrwyd, fel y canfu'r Adran Masnach a Diwydiant drwy ei hymchwil ei hun, a nododd mai Cymru sydd â'r nifer isaf o bobl sy'n cysylltu â'r Rhyngrwyd yn y DU.

Darparodd y canfyddiadau hyn y catalydd ar gyfer creu rhaglen i helpu busnesau bach a chanolig eu maint yng Nghymru i ddeall beth yw eFasnach, sut y gall helpu busnesau i dyfu, a sut y gellir rheoli prif faterion busnes a thechnoleg i sicrhau bod pob busnes yn elwa'n sylweddol. Mae'r wybodaeth a'r cymorth a ddarperir gan Gyfle Cymru ar gael i bob busnes bach a chanolig eu maint  - p'un a ydych yn barod i gymryd y cam cyntaf neu p'un a ydych eisoes wedi gweithredu prosiect eFasnach.

“O fewn 10 mis, aethom o 10 cwsmer allforio i 300 ac rydym yn parhau i leoli a chyflenwi cwsmeriaid newydd trwy gyfrwng yr ymgyrch eFarchnata yr ydym yn ei datblygu gyda chymorth Cyfle Cymru.”
John Hale, Bartondale Engineering, Hirwaun

Mae Cyfle Cymru yn cynnig amrywiaeth eang o wasanaethau. Gall ymgynghorwyr personol ymweld â phob busnes i ddarparu adolygiad eFasnach am ddim, a ddilynir gan wasanaethau ymgynghorol ychwanegol a gwerthfawr ac am gost isel. Yn ogystal, gallwn ddarparu cymorth ariannol os bydd busnes yn dymuno prynu cynnyrch a gwasanaethau a nodir drwy'r adolygiad eFasnach. Yn olaf, os bydd busnes yn dymuno dangos arfer gorau ac yn gallu rhannu ei lwyddiant, gallwn ei gefnogi yn ystod y cam hwnnw hefyd.

Cefnogir hyn i gyd gan gyfres o weithdai a seminarau sy’n cylchdroi ledled Cymru, a gyflwynir gan ein hymgynghorwyr a’n partneriaid yn ogystal â chan Gyfle Cymru yn uniongyrchol. I gael rhagor o wybodaeth am y digwyddiadau hyn a llawer mwy, cofrestrwch er mwyn cael mynediad i’n calendr digwyddiadau cynhwysfawr.

Bydd Cyfle Cymru yn newid agweddau tuag at eFasnach drwy helpu pobl i ddeall a sylweddoli'r manteision sylweddol a ddaw i'w busnes unigol yn ei sgîl o ran effeithlonrwydd, twf ac elw. Ar raddfa ehangach, amcan y rhaglen yw cydnabod cyfraniad sylweddol busnesau bach a chanolig at economi Cymru, a thrwy fabwysiadu eFasnach i gyfrannu at ei ffyniant ac at ymgais Cymru i ddod yn arweinydd yn yr Oes Wybodaeth.