Taith Rithwir
Iechyd a Harddwch

Proffil y Cwmni

Mae Lifestyle yn bartneriaeth sy’n cynnwys grw^p o ymarferwyr iechyd, harddwyr a therapyddion hunan-gyflogedig. Gan weithio o’u stiwdio, mae’r partneriaid yn cynnig ystod lawn o driniaethau harddwch, homeopathi a chyflenwol - megis profion alergedd, lleddfu meigryn, tyliniad pen Indiaidd, dull iachau egni Reiki, a thriniaethau anffrwythlondeb - yn ogystal â chyngor dietegol a thyliniad chwaraeon. Mae llawer o’r partneriaid yn parhau i gynnig ymweliadau â’r cartref ac mae nifer yn cynnig triniaethau yn eu meddygfeydd lleol.

Angen Busnes

Roedd y bartneriaeth yn awyddus i ddatblygu’r busnes ymhellach drwy adeiladu ar 4 blynedd o lwyddiant. Yn draddodiadol, cyfeiriwyd cleientiaid newydd i’r Lifestyle Studio ar dafod leferydd - argymhelliad gan ddeintyddion, meddygon a thrinwyr gwallt lleol ac, wrth gwrs, cleientiaid presennol. Arbrofodd y partneriaid â chyhoeddi cylchlythyr ledled Ewrop i’w werthu i ymarferwyr unigol er mwyn iddynt ei addasu’n arbennig cyn ei ddosbarthu ymlaen i’w cleientiaid eu hunain. Fodd bynnag, roedd effeithiolrwydd y broses hon wrth ddatblygu busnes newydd ac ychwanegol yn gyfyngedig.

Datrysiad eFasnach

I fynd i’r afael ag anghenion busnes, mae’r partneriaid wedi datblygu cynllun busnes, gyda help gan wasanaeth cymorth Llygad Busnes y WDA.

Cysylltodd y partneriaid â darparwyr TGCh i gael dyfynbris am gyflenwi, gosod a chynnal rhwydwaith cyfrifiadur personol ar gyfer y Stiwdio.

• Roedd angen chwe chyfrifiadur pen-glin a gweithfannau, gyda rhwydwaith di-wifr a mynediad Rhyngrwyd band eang.
• Gwnaethant hefyd integreiddio gwasanaethau bancio dros y We busnes yn uniongyrchol i becyn ariannol Microsoft Money.
• Ar gyfer gwerthiannau a marchnata ar-lein a chyhoeddi gwybodaeth addysgol - fel yr hyrwyddwyd yn flaenorol drwy’r cylchlythyr - gweithredwyd datrysiad dylunio Gwe hefyd. Trwy hyn, daeth y partneriaid yn fwy ymwybodol o’r We a sut y gellir adeiladu a chynnal tudalennau ar y we. I sicrhau bod y wefan yn cael ei datblygu i’r safonau uchaf ac i sicrhau y byddai’n denu’r amrywiaeth ehangaf posibl o ddarpar gwsmeriaid, gwnaethant ymchwilio’n helaeth ar y We ar gyfer gofynion y Ddeddf Gwahaniaethu ar sail Anabledd, gwybodaeth aradeileg a defnyddioldeb a lefelau hygyrchedd W3C.

Buddiannau Busnes

• P’un a fyddant yn gweithio o’r Stiwdio neu yn eu cartrefi, gall pob partner bellach gyfeirio at eu dyddiadur diweddar o apwyntiadau ar-lein a chael mynediad i nodiadau achos cyn ymgynghoriad yn ogystal â diweddaru cofnodion ar ddiwedd triniaeth.
• Gall cleientiaid drefnu apwyntiadau drwy’r Wefan yn ogystal â phrynu cynnyrch a argymhellwyd.
• Yn ogystal, gall ymarferwyr cysylltiedig islwytho’r cylchlythyr electronig a’i addasu cyn ei ddosbarthu i’r cleientiaid.
• Yn yr un modd, drwy’r Wefan, gall cleientiaid ac ymarferwyr cysylltiedig gael y wybodaeth ddiweddaraf am ddatblygiadau yn y maes homeopathi, therapi cyflenwol, tyliniadau chwaraeon a thriniaethau harddwch.
• Mae defnydd effeithiol o’r eBost i gyfathrebu â chleientiaid wedi helpu i ffurfio a chynnal a chadw cysylltiadau cadarn â chwsmeriaid.
• Fel ymarferwyr cymwys, gall y partneriaid hefyd ddefnyddio’r cyfrifiaduron personol i gael mynediad i’r Rhyngrwyd er mwyn meithrin sgiliau a chymwysterau newydd ac, yn y pen draw, datblygu eu dyheadau busnes.