|
Gweithio hyblyg yn hybu eich busnes
Beth yw gweithio hyblyg?
Y syniad tu ôl gweithio hyblyg yw gwaredu’r hen draddodiad naw tan bump a rhoi rhyddid i bobl a busnesau weithio ble a phryd sy’n addas iddyn nhw. Mae’n ceisio cydbwyso anghenion cyrff ac unigolion, gan bennu beth sydd orau i bawb. Nid oes un ateb syml. Gall fod yn gyfuniad o ddulliau, fydd gyda’i gilydd yn cynnig mwy o hyblygrwydd ac yn cynyddu cynhyrchiant y cwmni.
Nid yw gweithio oriau maith yn cynyddu cynhyrchiant. Yn wir mae pobl y Deyrnas Unedig yn gweithio mwy o oriau na gweddill Ewrop ond mae ein lefelau cynhyrchiant yn is. Felly, nid mater o weithio oriau mawr yw hi, yn hytrach cynyddu cynhyrchiant wrth newid ein dulliau gwaith. A gall gweithio’n hyblyg helpu.
I lawer o bobl mae gweithio hyblyg yn golygu ‘flexitime’ ond mae modd gweithio’n hyblyg mewn amryw ffyrdd, a’u cyfuno mewn ymateb i ofynion cyrff, cwsmeriaid a gweithwyr.
Gallant gynnwys:
- cywasgu amser
- rhannu swyddi
- gweithio gartref
- cronni oriau
- amserlen hyblyg
- cyfnodau ymddeol hyblyg
Sut allai gweithio hyblyg helpu’r busnes?
Mae gweithio hyblyg yn effeithio’r llinell waelod – gydag ymchwil yn dangos fod cwmnïau’n profi cynnydd mewn cynhyrchiant rhwng 15% a 31%. Gall hefyd helpu i ostwng costau – er enghraifft, o fewn swyddfeydd. Yn wir, mewn rhai achosion gall pob gweithiwr cartref llawn amser arbed oddeutu £6,000 y flwyddyn i gwmni.
Bydd gweithwyr hapus yn dda i’ch busnes. Os yn helpu eich gweithwyr i gydbwyso gofynion gwaith a hamdden, byddwch yn gweld effaith bositif ar eu morâl, cynhyrchiant a’r busnes yn gyffredinol. Nid rhywbeth ar gyfer cyrff mawr yn unig yw hwn – cred 59% o gyfarwyddwyr busnesau bach eu bod yn gallu gweithio’n hyblyg yr un mor effeithiol.
Yn ôl astudiaethau diweddar mae cwmnïau sy’n mabwysiadu gweithio hyblyg yn gweld llai o bobl yn colli gwaith oherwydd salwch a’r staff yn gyffredinol yn llai tebygol o newid swyddi. Bydd hefyd yn gostwng amserau cymudo, gan rannu’r amser hwnnw rhwng gofynion gwaith a chartref.
Y dyddiau hyn os am ddenu’r gweithwyr gorau, rhaid dilyn arferion cyflogwyr da – a gallai gweithio’n hyblyg helpu. Byddwch yn gweld cyfraddau absenoldeb yn gostwng ac yn datblygu criw o weithwyr galluog ar gyfer eich busnes.
Ym maes busnes, y fantais wirioneddol yw’r gallu i ragweld newidiadau, ymateb yn gyflym a bod ar gael 24/7 – ac wrth weithio’n hyblyg gallwch wneud hynny.
|
