Mathau gwahanol o eFasnach
Busnes-i-Fusnes



Fel yr awgryma'r enw, B2B yw'r term a ddefnyddir ar gyfer eFasnach mewn amgylchedd busnes yn unig. Mae'n cwmpasu'r ffyrdd niferus y gellir defnyddio eFasnach i gefnogi un busnes sy'n masnachu ag un arall.

Mae eFasnach B2B yn cael ei llywio o ddwy ochr. Ar y lefel ymarferol, mae busnesau sydd am ddefnyddio technoleg i ddatblygu ffyrdd gwell o weithio a chysylltiadau gyda phartneriaid masnachu ar hyd y gadwyn gyflenwi gyfan. Ym mhegwn arall y sbectrwm mae'r rhai sy'n darparu cynnyrch a gwasanaethau eFasnach sy'n datblygu syniadau a chysyniadau newydd ac sy'n gobeithio y bydd rhai yn llwyddo.

Mae llawer o'r sylw a roddir i B2B yn ymwneud â'r datblygiadau embryonig sy'n dod i'r amlwg, fel e-Farchnadoedd ac e-Gyfnewidfeydd, ond mae'r rhan fwyaf o'r defnydd gwirioneddol o eFasnach ar lefel is yn y gylchred gweithredu eFasnach.

Yn nodweddiadol yn yr amgylchedd B2B, gellir defnyddio eFasnach yn y prosesau canlynol:

• caffael;

• cyflawni archebion;

• rheoli cysylltiadau rhwng partneriaid masnachu.

I lawer o fusnesau bach a chanolig eu maint yng Nghymru, mae eFasnach yn gyfystyr â'r weledigaeth o gadwyni cyflenwi integredig. Er mai'r amcan terfynol yw hwn, yn y tymor byr, gellid defnyddio eFasnach B2B fel dull arwyddocaol o alluogi eu symudiad tuag at fwy o gydweithredu rhwng partneriaid masnachu.

Mae technolegau eFasnach wedi galluogi hyd yn oed y busnesau lleiaf i wella'r prosesau ar gyfer cysylltu â chwsmeriaid. Erbyn hyn gallant ddatblygu gwasanaethau ar gyfer cleientiaid unigol yn hytrach na darparu gwasanaeth safonol. Mae Pentwyn Splicers a leolir ym Mhont-y-pël yn gweithgynhyrchu plethwyr niwmatig ar gyfer marchnad tecstilau'r DU a'r byd. Gwerthuswyd pob agwedd ar eu proses busnes i weld lle y gellid sicrhau'r elw mwyaf. Roedd defnyddio'r We i werthu mwy o gynnyrch yn ystyriaeth gychwynnol, ond cafwyd y buddiannau mwyaf wrth ddarparu gwasanaethau cwsmeriaid a chymorth i'w dosbarthwyr dramor.

Ffordd amgen o ystyried eFasnach B2B yw drwy ei hystyried fel dull a ddefnyddir i:

• Denu, datblygu, cadw, a meithrin cysylltiadau gyda chwsmeriaid;

• Symleiddio'r gadwyn gyflenwi a'r prosesau gweithgynhyrchu a chaffael, ac awtomeiddio'r prosesau corfforaethol i ddarparu'r cynnyrch a'r gwasanaethau cywir i gwsmeriaid yn gyflyn am yn gost-effeithiol;

• Casglu, dadansoddi a rhannu gwybodaeth am gwsmeriaid a gweithrediadau'r cwmnïau, er mwyn gwneud penderfyniadau gwell.