Mathau gwahanol o eFasnach
Busnes i Weinyddiaeth


B2A yw'r maes eFasnach a ddatblygwyd lleiaf ac mae'n ymwneud â'r ffordd y mae sefydliadau'r sector cyhoeddus, ar lefel ganolog a lleol, yn darparu eu gwasanaethau ar-lein. Mae gan B2A, a elwir hefyd yn eLywodraeth, y potensial i gynyddu'r defnydd a wneir yn y cartref ac ym myd busnesau o eFasnach wrth i wasanaethau traddodiadol gael eu darparu fwyfwy dros y Rhyngrwyd.

Mae llywodraeth y DU yn ymrwymedig i sicrhau bod y wlad hon yn rheng flaen eFasnach ac mae'n hanfodol bod eLywodraeth yn chwarae rhan arwyddocaol wrth gyflawni'r amcan hwn.

Mae pedair egwyddor arweiniol wrth wraidd strategaeth y DU ar gyfer eLywodraeth, sef::

• Creu gwasanaethau o amgylch dewisiadau dinasyddion;
• Gwneud y llywodraeth a'i gwasanaethau yn fwy hygyrch;
• Sicrhau nad yw technoleg newydd yn creu rhaniad digidol rhwng y rhai sydd eisoes â mynediad i'r cyfryngau electronig a'r rhai sydd hebddo;
• Defnyddio gwybodaeth yn fwy effeithiol.

Mae'r llywodraeth ganolog yn arwain y ffordd gyda'r nod cyffredinol o gael 100% o wasanaethau ar-lein erbyn 2005. Bellach, mae gan 80% o'r cynghorau yn Lloegr eBost cyhoeddus a mynediad i'r rhyngrwyd, gyda 33% o'r awdurdodau yn meddu ar o leiaf tri gwasanaeth y gellir cael mynediad iddynt yn y dull hwn. Mae llawer o gynghorau bellach yn datblygu eu strategaethau eFasnach eu hunain, ond ychydig sy'n meddu ar ymagwedd a integreiddiwyd yn llwyr a ddisgwylir gan sefydliadau o faint cyfatebol ym myd busnes. Mae Andrew Davies, e-Weinidog Cymru, yn datblygu strategaeth ar gyfer e-Lywodraeth, ond ychydig o Awdurdodau Cymru sy'n ymddangos yn rheng flaen y datblygiadau.

Ar hyn o bryd, nid yw eFasnach, naill ai ar ffurf B2C neu B2B, yn berthnasol i bob busnes bach yng Nghymru, oherwydd nad oes rheswm penodol dros ddefnyddio eFasnach. Fodd bynnag, wrth i nifer cynyddol o wasanaethau'r sector cyhoeddus, o ffurflenni treth i geisiadau cynllunio, o geisiadau am atgyweiriadau i dai i adnewyddu eich pasport, gael eu cyflawni ar-lein, bydd y pwysau i newid yn cynyddu hefyd, a bydd gan nifer cynyddol o fusnesau bach a chanolig eu maint reswm dros ystyried symud tuag at arferion masnachu cyfoes.