Ffynhonnell Agored
Cyflwyniad

A allai eich busnes elwa ar feddalwedd am ddim o safon? Wrth gwrs y gallai. Ond, beth yw’r fagl? Cyhyd â’ch bod yn weddol gyfarwydd â defnyddio cyfrifiaduron (neu yn adnabod gwe ddatblygwr) nid oes magl. Dyma sut y gallwch arbed costau drwy fanteisio ar fudiad cynyddol a elwir yn feddalwedd ‘Ffynhonnell Agored’.

Fel y mae’r enw yn awgrymu, mae meddalwedd Ffynhonnell Agored yn cynnwys cod gwreiddiol sydd ar gael i’r cyhoedd wedi ei gynnwys â’r cynnyrch.  I’r gwrthwyneb, mae meddalwedd fasnachol, megis Microsoft Word, yn feddalwedd ‘ffynhonnell gaeëdig’ – gwarchodir y cod gwreiddiol gan y datblygwyr, ac ni chaiff ei ryddhau. Yn ymarferol golyga hyn fod cynnyrch ffynhonnell gaeëdig yn datblygu ar gyflymder a bennwyd gan y datblygwyr ac nid gan ddefnyddwyr y feddalwedd.

Ydy hyn o bwys?

Ydy. Gyda meddalwedd Ffynhonnell Agored, mae’r cod gwreiddiol ar gael i’w defnyddwyr, felly gall unrhyw un ychwanegu nodweddion newydd i’r feddalwedd. Oherwydd ei natur “agored”, mae’n bosibl sicrhau bod gan y feddalwedd lai o namau gan fod y defnyddwyr a’r datblygwyr yn cydweithio i ganfod namau, eu cywiro a rhyddhau fersiynau newydd o’r feddalwedd.

Pam fyddai unrhyw un yn treulio oriau maith yn datblygu meddalwedd ac yna’n ei rhyddhau am ddim?

Fel arfer cychwynnir prosiectau Ffynhonnell Agored gan grwpiau bach o bobl o anian debyg sydd angen meddalwedd i ddiwallu anghenion gwirioneddol. Ysgogir rhai grwpiau gan yr her dechnegol, a byddai’n well ganddynt ysgrifennu meddalwedd yn hytrach na phrynu cynnyrch parod, tra bod eraill methu’n deg â dod o hyd i gynnyrch masnachol sy’n diwallu eu hangen. Yn gyffredinol, fodd bynnag, po fwyaf yw’r angen am gynnyrch, y mwyaf o bobl fydd yn treulio amser yn gweithio arno – a’r mwyaf llwyddiannus fydd y prosiect.

Fel arfer caiff meddalwedd Ffynhonnell Agored ei datblygu gan rwydwaith o raglenwyr, dylunwyr, profwyr a rheolwyr prosiect, sydd yn aml yn gweithio yn eu hamser hamdden, ond yn cyfathrebu trwy Wefannau megis SourceForge a BerliOS a sefydlwyd yn benodol er mwyn hwyluso’r gwaith o ddatblygu meddalwedd Ffynhonnell Agored.