eOlwg
Diogelwch

Mae diogelwch yn un o’r pynciau sy’n aml ym mhenawdau’r newyddion – p’un a yw’n ddiogelwch ar-lein, cynllwyniau, feirysau neu’n haciwyr ar y rhyngrwyd, gall pob un ohonynt achosi problemau sylweddol i unrhyw fusnes. Cafwyd cymaint o bryder am ddiogelwch yn Adroddiad Cyflwr y Genedl Canolfan Arloesedd eFasnach 2004 fel y dywedodd busnesau bach a chanolig eu maint mai materion diogelwch oedd yr ail brif rwystr a oedd yn eu hatal rhag gwerthu eu cynnyrch yn effeithiol ar-lein.

Mae hwn yn fater lle y bydd buddiannau eFasnach yn llawer pwysicach na phryderon diogelwch, os caiff ei gyflawni’n effeithiol. Ar yr amod bod y busnes yn cymryd camau priodol, dylai cadw’r fenter yn ddiogel rhag bygythiadau diogelwch ddod yn dasg gymharol syml a hydrin.

Mae llawer o fygythiadau diogelwch allanol, ond i ddechrau dylai busnesau gymryd camau i sicrhau mai dim ond caledwedd a meddalwedd cymeradwy y bydd pob gweithiwr yn ei ddefnyddio ym mhob mater sy’n gysylltiedig â’r busnes. Mae hyn yn golygu rhoi polisi diogelwch ar waith i hysbysu’r staff o’r hyn y gallant ei wneud a’r hyn na allant ei wneud. Er enghraifft, ni ddylid gadael i unigolion lwytho meddalwedd anawdurdodedig i’w cyfrifiaduron personol pendesg, dylid cyfyngu ar y defnydd a wneir o gyfrifon eBost personol ac os na fydd eich system yn ei reoli ar eich cyfer dylid roi rheolau ar waith ynglŷn â derbyn ac agor ffeiliau a anfonir drwy eBost. Hefyd, mae’n bwysig bod unrhyw weithiwr o bell sydd â mynediad i’ch gwasanaethydd ond yn cysylltu drwy gyswllt diogelwch fel Rhwydwaith Preifat Rhithiwr.

Mae angen i bob defnyddiwr cyfrifiadur personol ddefnyddio synnwyr cyffredin i osgoi cynllwyniau rhwyd-dwyll. Negeseuon eBost neu Wefannau yw’r rhain sy’n ymddangos fel pe baent yn tarddu o ffynonellau dilys ond nad ydynt yn rhai dilys o bell ffordd. Y cais mwyaf cyffredin yw cais ffug i gael eich manylion bancio personol, a chynllwyniau a elwir yn 419 lle yr anfonir negeseuon eBost atoch sy’n ymddangos yn wych ar yr olwg gyntaf. Rhaid bod yn eithaf sinigaidd yn yr achosion hyn, a bydd cadw golwg ar y cynllwyniau diweddaraf yn eich helpu i sicrhau eich bod chi a’ch gweithwyr yn ymwybodol o’r bygythiadau diweddaraf.

Mae angen i bob busnes fabwysiadu mesurau diogelwch – waeth beth fo’u maint, a chymwysiadau diogelwch yn cynnwys meddalwedd gwrth-feirws ac mae llenni tân yn hollol hanfodol. Mae amrywiaeth eang o gyflenwyr yn cynnig cynnyrch diogelwch, felly mae’n bwysig adolygu’r nodweddion a gynigir gan wahanol gynnyrch i wneud yn siwr eich bod yn dewis yr un sydd orau i chi.

Waeth beth fo’r ateb y byddwch yn ei ddewis, gwnewch yn siwr eich bod yn llwytho’r wybodaeth ddiweddaraf am ddiogelwch yn rheolaidd oddi wrth eich cyflenwyr diogelu feirws a llen dân ynghyd â safleoedd fel Microsoft. Caiff nodiadau atgoffa diweddaraf eu creu yn awtomatig, ond gwnewch yn siwr bod y swyddogaeth hon yn gweithio’n gywir ar bob dyfais gysylltiedig a bod pob aelod o staff yn ymateb i’r ceisiadau llwytho.

Os ydych yn gwerthu i gwsmeriaid ar-lein bydd angen i chi sicrhau bod eich safle yn ddiogel a’ch bod yn rhoi sicrwydd gweledol drwy’r symbol clo yn y porwr, ac yn rhoi esboniad ysgrifenedig i ddweud wrth cwsmeriaid y rheswm pam y gallant siopa gyda chi ar-lein yn ddiogel.

Y newyddion da am ddiogelwch dros y rhyngrwyd yw nad oes angen gradd mewn cyfrifiadureg arnoch i ddefnyddio strategaeth ddiogelwch effeithiol. Fodd bynnag, mae’n rhaid i chi fod yn barod i roi rhywfaint o’ch amser yn rheolaidd i sicrhau eich bod yn cael y wybodaeth ddiweddaraf am faterion diogelwch, ac yna cymryd mesurau priodol i ddiogelu eich busnes.

Christine Holvey
Prif Weithredwr, Cyfle Cymru

I gael rhagor o wybodaeth am ddiogelwch y rhyngrwyd, ewch i www.cyflecymru.co.uk.