eOlwg
Meddalwedd Ffynhonnell Agored

Mae meddu ar y feddalwedd gywir ar gyfer eich busnes yn hanfodol, ond gall fod yn ddrud iawn hefyd.  Yn sicr, rwyf wedi gwario llawer o arian, ond arian  angenrheidiol, ar feddalwedd yn Cyfle Cymru dros y 5 mlynedd diwethaf.

Wrth i eFasnach barhau i ddatblygu, mae defnyddwyr yn galw am ddatrysiadau mwy pwrpasol i fodloni gofynion eu busnes, sydd, yn ei dro, yn golygu teilwra datrysiadau meddalwedd drud neu hyd yn oed ddatblygu systemau o’r newydd.

Erbyn hyn, diolch i’r Rhyngrwyd, mae’n fwyfwy posibl i unrhyw un sy’n meddu ar rai sgiliau TG i gael meddalwedd o ansawdd uchel am ddim, ac yn bwysig iawn, does dim byd anghyfreithlon yn hynny!  Gelwir y feddalwedd hon yn "Ffynhonnell Agored”, ac yn aml, caiff ei datblygu gan grwpiau bach o unigolion sydd angen darn penodol o feddalwedd i fodloni gofynion personol neu ofynion busnes.  Mae llawer o grwpiau, sy’n cael eu hysgogi gan yr her dechnolegol mae’n siŵr, yn dewis datblygu meddalwedd yn hytrach na’i phrynu.

Mae’r term Ffynhonnell Agored yn cyfeirio at y cod ffynhonnell a ysgrifennir i ddatblygu’r feddalwedd.  Gan fod y cod yn agored, mae’n bosibl i’r defnyddwyr eraill ychwanegu nodweddion newydd a gwneud datblygiadau pellach, a chan fod y datblygwr a’r defnyddiwr yn cydweithio ar y feddalwedd, nid yw bygiau a phroblemau yn codi mor aml, a chânt eu datrys yn gyflym.  Yn syml, mae sicrhau bod y feddalwedd yn gweithio er lles pawb.

Ar y llaw arall, pan fyddwch yn prynu meddalwedd oddi wrth un o’r prif gwmnïau, bydd y ffynhonnell ar gau.  Mae hyn yn ddealladwy oherwydd bod angen i’r sefydliadau masnachol hyn ddiogelu eu cynnyrch, ond mae’n golygu bod yn rhaid i chi aros i ddiweddariadau gael eu cyhoeddi, ac os oes gan y feddalwedd unrhyw wendidau, gall gymryd misoedd i ddatrys y broblem.

Mae meddalwedd Ffynhonnell Agored yn tueddu i gael ei datblygu gan rwydwaith o raglenwyr, dylunwyr, profwyr a rheolwyr prosiectau, sy’n gweithio yn eu hamser hamdden gan amlaf, ac yn cydweithio drwy Wefannau fel www.sourceforge.net ac www.berlios.de.  Crewyd y rhain yn benodol i ddatblygu meddalwedd Ffynhonnell Agored.  

Er nad ydych efallai’n gyfarwydd â Ffynhonnell Agored, er mwyn rhoi syniad i chi o ba mor boblogaidd yw’r math hwn o feddalwedd, mae safle Sourceforge yn cynnal dros 98,000 o brosiectau gweithredol ac mae ganddo dros 1,000,000 o ddefnyddwyr cofrestredig.

Er mwyn i chi gael eich blas cyntaf ar fyd Ffynhonnell Agored, gymerwch gipolwg ar y gwefannau y soniwyd amdanynt uchod, yn ogystal â www.hotscripts.com lle gallwch weld a oes cynnyrch yn bodoli a all ddiwallu eich anghenion.  Pan fyddwch wedi dod o hyd i gynnyrch a fydd o ddefnydd i chi, gwiriwch fod ganddo’r statws “aeddfed/sefydlog”, ac ymgynghorwch â’r fforymau prosiect cysylltiedig.  Byddant yn rhoi syniad i chi o’r profiadau a gafodd ddefnyddwyr presennol wrth ddefnyddio’r feddalwedd; yn gyffredinol, bydd y defnyddwyr hyn yn barod iawn i roi barn ddiduedd am y cynnyrch, felly peidiwch â bod ofn cysylltu â hwy.  Pan ydych yn hyderus o’ch dewis o feddalwedd Ffynhonnell Agored, y cyfan sydd angen i chi ei wneud yw ei llwytho, a’i defnyddio.

Pan fyddwch yn cyflwyno unrhyw feddalwedd i fusnes, mae angen rheoli’r gwaith hwnnw’n ofalus. Os ydych am gael datrysiad Ffynhonnell Agored, bydd angen i chi feddu ar fwy o wybodaeth TG ac amser ymchwil na’r hyn sydd gan fusnesau bach a chanolig eu maint fel arfer.  Ond, os byddwch yn dod yn gyfarwydd â’r broses, cewch eich synnu pa mor gyflym y gallwch ddod o hyd i’r feddalwedd Ffynhonnell Agored sydd ei hangen arnoch, a’r swm o arian y byddwch yn ei arbed.       

Christine Holvey
Prif Weithredwr, Cyfle Cymru