eOlwg
Meddwl am ganlyniadau

Mae Alex Tew, sy’n 21 mlwydd oed, a’i Hafan Miliwn o Ddoleri yn parhau i greu cyffro ymhlith y wasg, ac nid yw hynny’n syndod gan fod ei syniad wedi llwyddo i ddal dychymyg defnyddwyr y Rhyngrwyd o amgylch y byd. Mae stori Alex yn swnio bron fel sgript ar gyfer ffilm Hollywood; myfyriwr sy’n chwilio am ffordd o godi arian i’w gynnal yn y brifysgol yn cael syniad i werthu picseli (sef y dotiau bach sy’n gwneud delwedd sgrin) ar Wefan. Felly creodd Alex Wefan gyda miliwn o bicseli i’w gwerthu am ddoler yr un. O ganlyniad i faint bach picsel, roedd angen i brynwyr bwrcasu bloc o 100 o bicseli o leiaf, a gyda’i wefan nawr wedi gwerthu’r holl bicseli, mae Alex, o fewn chwe mis, wedi llwyddo i gronni ffortiwn.

Mae hyn yn dangos y canlyniadau rhyfeddol y gellir eu cyflawni drwy gael y syniad iawn ar yr adeg iawn, ac mae Mr Tew yn llwyr haeddu mwynhau canlyniadau ei syniad arloesol. Fodd bynnag, mae’n bwysig pwysleisio, er y bydd unigolyn bob hyn a hyn yn gallu cronni ffortiwn yn gyflym o’r Rhyngrwyd, nid hyn yw’r arfer o bell ffordd.

Yn hytrach, mae’n llawer mwy realistig i bobl fusnes Cymru ddeall y gall sicrhau eu bod yn gweithredu strategaeth e-fasnach effeithiol helpu eu busnesau i ddod yn fwy effeithlon, ennill mwy o gwsmeriaid, cynyddu elw ac yn y pen draw dod yn fwy cynaliadwy.

Nawr, er nad yw’r ymagwedd hon at ddefnyddio e-fasnach yn swnio mor gyffous â gwneud miliwn mewn chwe mis, yn sicr mae’n helpu busnesau i ddeall bod eFasnach yn arf y dylid ei integreiddio’n briodol i mewn i weithrediadau busnes.

Er hynny, mae gwers arwyddocaol i’w dysgu o brofiad Alex Tew, sef pwysigrwydd cymryd saib i feddwl. Mae pobl sy’n rhedeg eu busnesau eu hunain yn dueddol o orfod gwisgo sawl het wahanol yn ystod y diwrnod gwaith. Treulir amser yn gofalu am gynhyrchu, gwerthu, personél a gwaith papur, nad yw’n gadael fawr ddim o amser ar ôl i feddwl yn greadigol.

Ond, mae meddwl o’r fath yn hanfodol gan ei fod yn caniatáu i syniadau newydd lifo i mewn i’r busnes, ac wrth gwrs, efallai na wêl nifer o’r rhain olau dydd, ond dim ond un neu ddau syniad llwyddiannus y mae’n ei gymryd i gael effaith gadarnhaol sylweddol ar fenter. Pwy a wyr beth fyddai’r effaith pe bai pobl fusnes Cymru yn neilltuo awr yr wythnos a hynny dim ond i feddwl am ffyrdd o wella eu busnesau. O safbwynt eFasnach, gallai busnesau feddwl am eu cynnyrch, ac er enghraifft, os nad ydynt yn eu gwerthu ar-lein, pam lai? Gallant hefyd ystyried eu Gwefannau; ydynt wedi’u diweddaru, a ydynt yn gweithio’n well na rhai eu cystadleuwyr, a yw’n hawdd i gwsmeriaid ei defnyddio, pa welliannau sydd eu hangen?

Gall ymweld â www.cyflecymru.co.uk helpu i roi ysgogiad i feddwl am y ffyrdd y gall busnesau ddefnyddio eFasnach yn effeithiol. Mae’r Wefan yn cynnwys astudiaethau achos o fusnesau yng Nghymru sydd wedi cymhwyso eu meddwl yn llwyddiannus ac sydd bellach yn gweld y buddiannau o wneud defnydd effeithiol o eFasnach.

Christine Holvey
Prif Weithredwr, Cyfle Cymru